Dünya şöhrətli tenor, Azərbaycanın Xalq artisti Yusif Eyvazovun Paris Milli Operasının "Opéra Bastille" səhnəsindəki çıxışları Parisin cari teatr mövsümünün diqqətçəkən hadisələrindən birinə çevrilib.
Yusif Eyvazov Cakkomo Puççininin "Toska" operasında Mario Kavaradossi partiyasını böyük uğurla ifa edib. Maraqlıdır ki, sənətçi bir repertuar bloku çərçivəsində səhnəyə yeddi dəfə çıxaraq yüksək vokal ustalığı və səhnə dözümlülüyü nümayiş etdirib.
Personajların psixoloji dərinliyinə vurğu edən və təmkinli səhnə həlli ilə seçilən quruluşun rejissoru Pyer Odi, musiqi rəhbəri isə Yusif Eyvazovun çoxillik əməkdaşlıq etdiyi dirijor Cader Binyaminidir.
Sənətçi vurğulayıb ki, Kavaradossi partiyası mürəkkəb vokal vəzifələri dərin dramatik komponentlərlə birləşdirərək dünya opera repertuarının əsas partiyalarından biri hesab olunur.
Parisin bu çıxışları müğənninin "Teatro alla Scala"dakı uğurlu qastrollarından (orada "Turandot" operasında Kalaf partiyasını ifa edib) qısa müddət sonraya təsadüf edib.
Eyvazovun sözlərinə görə, Paris tamaşaçısı yüksək tələbkarlığı və sənətçilərə verdiyi obyektiv qiyməti ilə seçilir. Tamaşalar seriyasını başa vuran müğənni qeyd edib ki, bütün çıxışlar uğurla keçib və onun peşəkar inkişafında mühüm mərhələ olub.
Quruluşun uğuru davamlı olub: Paris Milli Operası Yusif Eyvazovu yenidən əməkdaşlığa dəvət edərək onunla növbəti mövsüm üçün müqavilə bağlayıb. Sənətçinin planlarına yeni quruluşlarda, o cümlədən "Turandot" və Cüzeppe Verdinin "Trubadur" operalarında iştirak daxildir.
