“Jiquli” dərəyə yuvarlandı, yaralılar var (FOTO)

Şirvan şəhəri ərazisində 4 nəfərin yaralanması ilə nəticələnən yol qəzası baş verib. ANS-in verdiyi məlumata görə, hadisə Hacıqabul-Bəhrəmtəpə avtomobil yolunun 8-ci km-də Şirvanın 1 May küçəsində qeydə alınıb.



Sabirabad istiqamətində hərəkətdə olan “VAZ-2107” markalı avtomobil qarşıdan gələn “Chevrolet Niva” markalı avtomobillə toqquşub. Zərbə nəticəsində “Jiquli” yoldan çıxaraq dərəyə yuvarlanıb. Digər avtomobil isə yol kənarındakı qaz borularına çırpılaraq dayanıb.



Hadisə nəticəsində “VAZ-2107” markalı avtomobilin sürücüsü 39 yaşlı Şahlar Tapdıqov, sərnişinlər 58 yaşlı Elmira Tapdıqova, 43 yaşlı Mənsurə Raxmatova və 32 yaşlı İlahə Nağıyeva müxtəlif dərəcəli xəsarətlər alaraq Şirvan şəhər Mərkəzi Xəstəxanasına yerləşdirib. Hadisənin hansı sürücünün səhvi üzündən baş verməsi polis tərəfindən araşdırılır.