TQDK sədri yeni təhsil nazirinin attestatlarla bağlı təklifinə münasibət bildirdi

Tələbə Qəbulu üzrə Dövlət Komissiyasının (TQDK) sədri Məleykə Abbaszadə təhsil naziri Mikayıl Cabbarovun 11-ci sinfi bitirən bütün məzunlara attestatın verilməsinin tərəfdarı olması ilə bağlı söylədiyi fikrə münasibət bildirib.

Trend-in məlumatına görə, çərşənbə axşamı jurnalistlərə açıqlamasında M. Abbaszadə qeyd edib ki, hələlik attestatlar məzunlara mövcud qanunvericiliyə uyğun olaraq veriləcək:

"Mövcud qanunvericilik var. Hələki attestatlar qanunvericiliyə uyğun veriləcək. Bu, hələ təklifdir. Bu təklif müzakirə edilib, qərar qəbul olunduqdan sonra onu icra edəcəyik".

Qeyd edək ki, Mikayıl Cabbarovun bütün 11-ci sinif şagirdlərinin attestat almasının tərəfdarı olduğunu söyləyib. O, bunu qanunvericilik və sosial ədalət baxımından düzgün sayıb.