“Oğlan evi 2” filminin təqdimatı keçirilib

Ötən gün “Oğlan evi 2” komediya filminin qala gecəsi keçirilib.

Təqdimat mərasimi Nizami Kino Mərkəzində baş tutub.

“Oğlan evi 2”nin əsas hadisələri filmin birinci hissəsindən ən çox yadda qalan Baba (aktyor Elcan Rəsulov) obrazının ətrafında cərayan edib.

Yaradıcı heyət ekran işində “Bozbash Pictures”in məşhur aktyoru Nicat Rəhimov və video-bloqqer Hüseyn Əzizoğlunu çəkib.

Rejissor İlham Qasımovun ötən filmində bir mənzilin bir neçə nəfərə satılması problemi qabardılmışdısa, bu dəfə qəhrəmanlar maşın alverçilərinin fırıldağının qurbanı olublar.

Jurnalistlərə açıqlama verən N.Rəhimov həyəcanlı olduğunu gizlətməyib:

“Film üzərində çox əziyyət çəkdik. İnanıram əziyyətimiz yerdə qalmayacaq. Qala gecəmiz də fərqlidir”.

Hüseyn Əzizoğlu “Bu mənim rol aldığım ilk filmdir. Şadam ki, peşəkar rejissor və aktyorlarla bir araya gəldim” - deyə bildirib.

E.Rəsulov isə çəkiliş prosesindən danışıb:

““Oğlan evi 1”lə ikinci ekran işi arasında xeyli fərq var. İlk bölüm ev oğrularından bəhs edirdi. Bu dəfə isə avtomobil oğruları var. Çəkilişlərimiz 2 ay davam etdi”.

Gecədə kino və şou dünyasının tanınmış simaları iştirak edib.








Qafqazinfo
Foto: Oğlan Evi 2 / Facebook