"Azərbaycanda benzinin qiyməti..."

"Azərbaycanda yanacağın qiymətinin neftin dünya qiyməti ilə heç bir bağlılığı yoxdur".

ANS-in məlumatına görə, bunu SOCAR prezidenti Rövnəq Abdullayev gənc neftçilərlə görüşdə bildirib.

"Bizdə neftin qiymətini Tarif Şurası ümumi Azərbaycan iqtisadiyyatı və orta qiymətlər fonunda müəyyən edir. Azərbaycanda cəmi bircə dəfə daxili bazarda qiymət xarici bazardakından bir az yüksək olub. O da cəmi bir-iki ay davam edib. Hazırda Azərbaycanda neftin qiyməti 40 sentdir. Bu, ABŞ-dakı qiymətlərlə müqayisədə çox ucuzdur", - deyə Rövnəq Abdullayev bildirib.





Dünya bazarında qara qızılın qiymətinin ucuzlaşması fonunda gündəmə gələn məsələlərdən biri də benzinin qiymətində dəyişikliyin ola biləcəyi ilə bağlı idi. Amma SOCAR rəhbəri bu suallara aydınlıq gətirərək bildirdi ki, Azərbaycanda yanacağın qiymətinin neftin dünya qiyməti ilə heç bir bağlılığı yoxdur.

Hazırda Azərbaycanda yalnız Aİ-92 markalı benzin istehsal olunur. Aİ-95 və Aİ-98 markalı benzinlər isə xaricdən idxal olunur.

Neft Araşdırmaları Mərkəzinin rəhbəri İlham Şaban isə hesab edir ki, hazırkı dövrdə qiymətdə dəyişiklik edilməsi səmərəli deyil. Əgər benzinin qiyməti ucuzlaşarsa, o zaman büdcə gəlirləri azalacaq.

"Əgər yanacağın qiyməti artırılarsa, bu, büdcəyə, eləcə də əhaliyə böyük zərbədir. Təsəvvür edin ki, yanacaq bahalaşarsa, yemək də, ərzaq da, geyim də, ümumiyyətlə bazarda nə varsa hamısı bahalaşacaq. Bu da büdcədə yenə kəsirlərə, ixtisarlara səbəb olacaq. Ona görə hökumət qiyməti tənzimləməyə çalışır". -deyə mütəxəssis əlavə etdi.



İqtisadçı ekspert Samir Əliyev isə belə düşünmür. O hesab edir ki, yanacağın ucuzlaşdırılması ölkədə daşınma xərclərini əhəmiyyətli dərəcədə aşağı sala bilər. Bu da öz növbəsində malın, xüsusilə də kənd təsərrüfatı məhsullarının maya dəyərini azaldar.

"Hazırda Qazaxıstanda Aİ -95 markalı benzin 0,35 avro, Aİ-98 benzini 0,38 avro, dizel 0,26 avrodur. Rusiyada isə Aİ-95 benzini 0,44 avro, Aİ-98 benzini 0,50 avro, dizel 0,42 avroya satılır.

Azərbaycanda Aİ-92 benzini ( 0.70 AZN), Aİ-95 (premium) benzini 0,47 avro (0.95 AZN), dizel isə 0,35 (0.60 AZN) avroya bərabərdir.