Makedoniyada xüsusi əməliyyat zamanı 5 polis əməkdaşı həlak olub, daha 30-u yaralanıb

Makedoniyanın şimalındakı Kumanovo bölgəsində silahlı dəstəyə qarşı 15 saat davam edən xüsusi əməliyyat zamanı 5 polis əməkdaşı həlak olub, daha 30-u isə yaralanıb.

APA-nın “TASS”a istinadən verdiyi xəbərə görə, yerli əhali arasında itkilər barədə məlumat verilmir.

Məlumata görə, xüsusi əməliyyat zamanı aparılmış danışıqlar nəticəsində 30 silahlı polisə təslim olub.

Atışma zamanı azı 5 silahlı öldürülüb, 15-dək silahlı mühasirəni qıraraq ərazini tərk edə bilib.

Qeyri-rəsmi məlumatlara əsasən, silahlı dəstə Makedoniyaya Kosovo ərazisindən hücuma keçib.