Bu gün 2 nəfərin cəsədi çıxarılıb, 7 nəfər isə xilas edilib

Bu gün Xəzər dənizindən və Kür çayından 2 nəfərin cəsədi çıxarılıb, 7 nəfər isə xilas edilib.

APA-nın Fövqəladə Hallar Nazirliyinin (FHN) Dövlət Sularda Xilasetmə Xidmətinə (DSXX) istinadən verdiyi xəbərə görə, Xaçmaz rayonunda dənizdə 1993-cü il təvəllüdlü Qənbərzadə Təbriz Etibar oğlu batıb. Dərhal FHN-nin xilasetmə qüvvələri hadisə yerinə cəlb olunub. T. Qənbərzadənin cəsədi “Nabran” sularda xilasetmə məntəqəsinin xilasediciləri tərəfindən tapılaraq çıxarılıb.


Bu gün FHN-nin xilasediciləri Xaçmaz rayonunda dənizdə batma təhlükəsi ilə üzləşmiş bir nəfəri, Mingəçevir şəhərinin su anbarında nəzarət olunmayan ərazidə isə 4 nəfəri xilas ediblər. Həmçinin Kür çayının Şirvan şəhəri ərazisindən keçən hissəsində bir nəfər, Bakının Xəzər rayonunda isə dənizdə batma təhlükəsi ilə üzləşmiş daha bir nəfər xilas olunub.

Bu gün həmçinin iyulun 19-da Kür çayının Salyan rayonu ərazisindən keçən hissəsində batmış 1962-ci il təvəllüdlü Mirzəyev Heydərağa Həsənağa oğlunun axtarışları da başa çatıb. Onun cəsədi batdığı yerdən 2 km aralıda tapılaraq çıxarılıb.