Dünya şöhrətli skripkaçı İtzhak Perlman Heydər Əliyev Mərkəzində konsert verəcək

Aprelin 28-də Heydər Əliyev Mərkəzində dünya şöhrətli skripkaçı, 15 "Qremmi" və 4 "Emmi" mükafatı laureatı İtzhak Perlmanın konserti olacaq.
Mərkəzdən Trend-ə verilən məlumata görə, yəhudi əsilli amerikalı musiqiçi Bakı tamaşaçıları qarşısında tanınmış şri-lankalı pianoçu Rohan de Silvanın müşayiəti ilə çıxış edəcək. Klassik musiqi gecəsində dahi bəstəkarlar Lüdviq van Bethovenin, Rixard Ştrausun və Klod Debüssinin ölməz əsərləri təqdim olunacaq.
İ.Perlman 1945-ci ildə İsraildə doğulub, Təl-Əviv Musiqi Akademiyasında, daha sonra ABŞ-ın incəsənət sahəsində ən böyük tədris müəssisələrindən olan Culyard Məktəbində təhsil alıb. 1964-cü ildə Amerikada akademik musiqi ifaçıları arasında keçirilən nüfuzlu Leventrit Müsabiqəsinin qalibi olub və bu, onun gələcək karyerasına əhəmiyyətli təsir göstərib. Virtuoz skripkaçı həmin vaxtdan məşhur orkestrlərlə və solo konsertlərlə dünyanı dolaşır. İndiyədək müxtəlif ölkələrin mötəbər salonlarında, o cümlədən ABŞ-ın Kennedi Mərkəzində, bir neçə dəfə Ağ Evdə çıxış edib.
İ.Perlman həm də dirijorluğu ilə tamaşaçıları heyran edib. Nyu-York Filarmoniyası, Milli Simfonik Orkestr, Filadelfiya Orkestri, Los-Anceles Filarmoniyası, Çikaqo, Boston, San-Fransisko, Sent-Luis, Dallas, Hyuston simfonik orkestrləri və digər kollektivlər onun rəhbərliyi altında konsert proqramları ilə çıxış edib.
İ.Perlman 2005-ci ildə Culyard Məktəbinin 100 illik yubileyi münasibətilə bu təhsil müəssisəsinin fəxri doktoru adına və medala layiq görülüb. O, 1986-cı ildə ABŞ-ın "Azadlıq medalı", 2000-ci ildə isə "Milli incəsənət medalı" ilə təltif olunub.
Şərhlər
Mədəniyyət bölməsinin xəbərləri

Aygün Bəylər dəfn olunub

  • 08 янв, 14:57