Azərbaycanda ət istehsalı 3%, yumurta istehsalı 5% artıb

2016-cı ilin yanvar-sentyabr aylarında kənd təsərrüfatının ümumi məhsulunun faktiki qiymətlərlə dəyəri 4 mlrd. 614,3 mln. manat təşkil edib.

Dövlət Statistika Komitəsindən APA-ya verilən məlumata görə, bunun 2 mlrd. 220,2 mln. manatı heyvandarlıq, 2 mlrd. 394,1 mln. manatı isə bitkiçilik məhsullarının payına düşüb.


Əvvəlki ilin müvafiq dövrü ilə müqayisədə kənd təsərrüfatı məhsulu istehsalı 2,4%, o cümlədən bitkiçilik məhsulları üzrə 1,8%, heyvandarlıq məhsulları üzrə 3,1% artıb.

Tarlalarda dənli və dənli paxlalıların yığımı əsasən başa çatıb. Oktyabrın 1-i vəziyyətinə dənli və dənli paxlalı bitkilərin (qarğıdalısız) əkin sahəsinin 99,8%-i, yaxud 959,6 min hektarı biçilib və həmin sahələrdən 2 mln. 836,3 min ton (keçən il 2 mln. 782,4 min ton) taxıl məhsulu götürülüb. Hər hektardan orta hesabla 29,6 sentner məhsul yığılıb.

Bundan başqa, yığılacaq dən üçün qarğıdalı sahəsinin 82,2%-dən, yaxud 29,6 min hektarından 174,5 min ton məhsul toplanıb, hər hektardan orta hesabla 59 sentner qarğıdalı dəni götürülüb.

Qarğıdalı dəni nəzərə alınmaqla taxıl istehsalının ümumi həcmi keçən ilə nisbətən 2% və yaxud 60,1 min ton artaraq 3 mln. 10,8 min tona çatıb.

Yığım başlanandan oktyabr ayının 1-dək sahələrdən 870,9 min ton və ya əvvəlki ilin müvafiq dövrünə nisbətən 48,6 min ton çox kartof, 1 mln. 150,3 min ton (22,4 min ton az) tərəvəz və 461,4 min ton (20,1 min ton az) bostan məhsulları toplanıb. Eyni zamanda, hektarın orta məhsuldarlığı kartof üzrə 5 sentner, tərəvəz üzrə 3 sentner, bostan məhsulları üzrə 2 sentner artıb və uyğun olaraq 141, 160 və 175 sentner olub.

Cari ildə tütünün əkin sahəsinin 73,4% artması tütün yarpağı istehsalının artmasına səbəb olub və qurudulmuş çəkidə 3,1 min ton tütün yarpağı yığılmaqla, keçən ilki səviyyəni 9,8% üstələyib.

Oktyabrın 1-i vəziyyətinə 17,1 min ton dən üçün günəbaxan istehsal edilib. Operativ məlumata görə, oktyabrın 3-ü vəziyyətinə sahələrdən 12,1 min ton pambıq yığılaraq tədarük müəssisələrinə təhvil verilib.

2016-cı ildə 7,1 min hektar sahədə emal üçün şəkər çuğunduru əkilib. Hazırda bu məhsulun yığımı davam edir və hesabat tarixinə 1826 hektar sahənin (əkinin 25,9%-i) çuğunduru qazılaraq çıxarılıb və həmin sahələrdən hər hektardan 324 sentner olmaqla 59,1 min ton məhsul götürülüb.

Hesabat tarixinə 538,8 min ton və yaxud keçən ildəkindən 5,4 min ton (1%) çox meyvə və giləmeyvə, 98,7 min ton və yaxud 13 min ton (11,6%) az üzüm, 891,9 ton və yaxud 335,4 ton (60,3%) çox yaşıl çay yarpağı yığılıb.

Təsərrüfatlarda 2017-ci ilin məhsulu üçün müvafiq işlər görülür. Təmiz herik şumu daxil olmaqla cari ilin payızlıq əkinləri üçün 481,9 min hektar və ya keçən ilin müvafiq dövründəkindən 3,2% çox sahədə şum qaldırılıb. Gələn ilin məhsulu üçün 17,6 min hektar sahədə dən üçün payızlıqlar səpilib. Ümumi əkinin 6,3 min hektarı və ya 35,8% buğda, 11,3 min hektarı və ya 64,2%-i arpa əkinləridir.

2016-cı ilin 9 ayı ərzində ölkə üzrə diri çəkidə 341,3 min ton mal-qara və quş əti, 1 mln. 505,6 min ton süd, 1 mlrd. 214 mln. ədəd yumurta və 16,8 min ton yun istehsal edilib. 2015-ci ilin eyni dövrü ilə müqayisədə ət istehsalı 9,9 min ton və ya 3%, süd istehsalı 36,1 min ton və ya 2,5%, yumurta istehsalı 56,6 mln. ədəd və ya 4,9%, yun istehsalı 240,6 ton və ya 1,5% artıb.

Oktyabrın 1-i vəziyyətinə təsərrüfatlarda 2 mln. 720,8 min baş iribuynuzlu mal-qara, o cümlədən 1303,8 min baş inək və camış, 8740,7 min baş qoyun və keçi, 5,5 min baş donuz mövcud olub. 2015-ci il oktyabrın 1-ə nisbətən iribuynuzlu mal-qaranın sayı 0,6%, o cümlədən inək və camışların sayı 0,2% artıb, qoyun və keçilərin sayı eyni səviyyədə qalıb, donuzların sayı isə 12,6% azalıb.

Yanvar-sentyabr aylarında quşçuluq müəssisələrində diri çəkidə 49,6 min ton quş əti və 497,6 mln. ədəd yumurta istehsal edilib. Ümumilikdə bu müəssisələrdə 9,7 mln. baş quş istehsal olunub.