Bakıda iki minik avtomobili toqquşub, 4 nəfər xəsarət alıb

Bakıda ağır yol qəzası baş verib, 4 nəfər xəsarət alıb.


APA-nın məlumatına görə, hadisə Hövsan yolunda qeydə alınıb.


Hövsan qəsəbəsindən Zığ şosesi istiqamətində hərəkətdə olan VAZ-2107 markalı avtomobil əks istiqamətdə hərəkət edən “Mercedes” markalı maşına çırpılıb. Qəza nəticəsində “Mercedes”in sürücüsü və sərnişini, eləcə də, VAZ-2107-də olan iki adın sərnişin xəsarət alıb. Yaralılar hadisə yerinə çağırılan təcili tibbi ardım briqadaları tərəfindən xəstəxanalara çatdırılıb.


Qəzada xəsarət alanlardan 3-ünün şəxsiyyəti məlum olub. 3 saylı Şəhər Klinik Xəstəxanasından APA-ya verilən məlumata görə, qəza nəticəsində “Mercedes”in sürücüsü 31 yaşlı Quliyev Ruslan Rəsul oğlu, sərnişini 41 yaşlı Hüseynov Zaur Hüseyn oğlu, eləcə də, VAZ-2107-də olan sərnişin 19 yaşlı Həsənova Fatimə Əfrail qızı xəsarət alıb. Xəsarət alan ikinci qadının şəxsiyyəti dəqiqləşdirilir.


Suraxanı Rayon Polis İdarəsi və Bakı Şəhər Dövlət Yol Polis İdarəsinin əməkdaşları hadisə yerində müayinələr aparıblar. İlkin ehtimala görə, VAZ-2107-nin sürücüsü, 1991-ci il təvəllüdlü Abdurәhimov Zaur Mübariz oğlunu sükan arxasında yuxu tutub. Nəticədə avtomobil qarşıdan gələn “Mercedes”ə çırpılıb.


Suraxanı Rayon Polis İdarəsində faktla bağlı araşdırmalar davam etdirilir.
Şərhlər
Hadisə bölməsinin xəbərləri